الأربعاء، 21 مايو 2008

تحليل (1) - الاولى و الرابعة و الخامسة






كثر الكلام بعد الإنتخابات عن الخاسر و الفائز في إنتخابات 2008



دعوني بكل تواضع أحلل اللي صار و اللي شفته بأم عيني



الاولى:



وصلت الطائفية و القبلية و العنصرية الى ذروتها في هذه الدائرة و خير دليل على كلامي المسجات البايخة من موقع الحقيقة و غيرها اللي كانت إتقول



إتفق أهل السنه على فلان و علان



أو



ترى الشيعة كلونا إتحدوا يا أهل السنه



إشدعوه



الفلوجة مو الدائرة الاولى



!!!



و إلتفاف بعض الشيعة حول بعض مرشحيهم و السبب عماد مغنية اللي مات و شبع موت بسوريا و أثر موته بإنتخابات الكويت



و السبب تعاطي الحكومة مع هالقضية

!!



و تكل عازمي من 4 مرشحين و كأن لسان حالهم يقول ما نبي من أحد شي



و الكنادرة قاموا يضربون بعض



أول مرة أسمع كندري بدوي و كندري حضري

؟؟؟؟



جاسم الكندري إمحول 1000 كندري بدوي من أهل الرقة

!!!!!



و أخيرا
فاز من فاز و توزعت المقاعد و اللي ما عنده قاعده من 4000 واحد من قبيلته أو أهله أو جماعته "بفتح الألف" ما فاز



بتقولون الرومي و عبدالواحد بقولكم اللي صار إنه كثير من السنه الحضر الغير منتمين لأي مما سبق ذكره كان يردد



من أعطي ما عندي أحد



!!!



إشدعوه 60 مرشح و ما عندكم أحد

!!!



اللي فاز التعصب و اللي خسر الإختيار الحر البعيد عن التعصب البغيض بشتى أنواعه



الرابعة و الخامسة:



أنا أقول عطني قبلية و فرعية أكثر و الدبوس !!!!



و السبب بوجهة نظري هي وزارة الداخلية



عندها صندوق فرعية المطران بالرابعة و ساحبه الدبوس مليون مرة للتحقيق بتهمة شراء الأصوات و كاش و جناسي و آخرتها الكل براءة



في دليل أكبر من هذا

؟؟؟





هل السبب الدوائر ال 5 أو عقلية الناس اللي رسخت (بضم الراء) فيها الطائفية و القبلية و الشللية



و من كان السبب في تأزيم هذ الدوائر قبل إدلاء الناس بأصواتهم



؟؟



ملاحظه : دام في هناك ألم من إخوانا الجهراوية لعدم وصول أحد أبنائها للمجلس فأنا لي الحق كمشرفاوي أن أتألم و الجابراوي بعد و القريناوي و الميسلاوي و الصباح السالماوي و الخ

!!!!!



و راح أترك الدائرتين الثانية و الثالثة لوقت آخر و متخصص آخر



و دمتم








هناك 7 تعليقات:

kila ma6goog يقول...

نبي الثالثة

قلوبنا متروسة

lle يقول...

يا بو سلمى

لما تشوف إورقه فيها

الطبطبائي
أسيل
جمال العمر
السعدون

أو

شمساه الاول بالجابرية

إتعرف الثالثة !!!!!

بس أفا عليك بس راح إييك التحليل بعد التمحيص إنشاءالله

Q8i Blogger يقول...

الجهرا ليست منطقه كصباح السالم .. بل هي تعتبر محافظه كامله .. وعدم وصول اي نائب منها شيء غريب جدا .. ومالومهم في الحزن هذا لأنه القبائل إتفقت عليهم
وتره الجهرا في السابق ماكانت مثل باجي مناطق القبائل .. فلا يوجد فرعيات فيها وكثير من الحضر استطاع الوصول إلى قبه البرلمان عن طريق الجهراء .. امثال العيار والسعيد


الدائرة الأولى
من دفع باتجاه الطائفيه البغيضه الي صارت هم للأسف شيعه المنطقه بتحالفاتهم الغير منطقيه
فنرى انور بو خمسين صاحب العقل المتفتح .. الليبرالي نوعا ما .. مرته مو متحجبه اصلا .. يتعاون مع صالح عاشرو صاحب الفكر الاسلامي الشيعي المتعصب
!!!!!
اشلون يركب هذا مع هذا
هالاتفاقات اهي الي دفعت السنه للدعوه للتعاون ونسيان التوجهات .. وخصوصا تركيز الاصوات على الرومي والعوضي

تحليلك جيد للأولى .. وانا عندي تحليل مطول عنها اذا ودك تشوفه

وماتقصر ياخوي

lle يقول...

الجهرا محافظة و مبارك الكبير محافظة و حولي محافظة
و ما فيها ولا نائب فايز

بعدين إهي ضمن دائرة و اللي فازوا يمثلون كل لكويت مو محافظاتهم أو مناطقهم

فأنا شخصيا ما أشوف له داعي تقسثم الكويت الى محافظات او مناطق

بسنا تقسيمات

che يقول...

كلامك عدل الصراحه الي شفناه كان شي غريب وعجيب الشيعه كلونا ولا الكنادره الحين قاعدين يتهمون بعض انه ليش جمال مادش وليش جاسم خرب على مادري منو وانا بعرف شغله يعني شنو راح يصير اذا مادش كندري ولا عازمي ولا مطيري ولا جهراوي للمجلس ؟؟ شنو راح يصير اذا ولد العايله الفلانيه مادش ؟؟
الشعب مو راضي يفتهم انه نبي ناس على قدر المسئولييه تشرع للبلد مو ناس تصير حالها حال الكرسي الي قاعده عليه
اما الدائره الثالثه والثانيه عندنا حجي يعور لبعض ناس
وسلامتكم

Arfana يقول...

رد فعل الجهراوية متوقع.. فالجهراء عزلت -بضم العين على قولتك- من سنين.. والمستشفى والمدارس والخدمات بشكل عام كانت وما زالت لا ترقى لنسبة التضخم السكاني.. وهذي واحدة من عدة مشاكل للدوائر الخمس وعشرين اللي عززت هالعزل وجدد طرح الجهرا وخذت -بكسر الواو - من قبل مرشحي الجهراء

أتمنى تساقط فكرة الفرعيات مع هالمشكلة.. لأن اللي كان يعتقد إنه لازم يمثل قبيلته ألحين شايف إنه لازم يمثل منطقته

أما الخامسة.. فمعاك 100% بأن الحكومة بدعت بقضية الدبوس وخلته بطل شعبي.. لا بد من الجدية في جمع الأدلة والتحليل الجنائي وتعديل القوانين

عموما تسلم إيدكم وسوري عالطوالة
:-)

فريج سعود يقول...

ممكن نكون واقعيين شوي تبون بس الشيعة الي يصيرون شريف روما بهالانتخابات وبدائرتهم الوحيده علشان يطلع منهم اثنين بس ذيك الساعة يصيرون بنظر الناس خوش ناس وماعندهم طائفية
يا ناس الشيعة ماعندهم غير الدائرة الاولى
مثل ما للمطران غير الدائرة الرابعة وغيرهم بالخامسة
الكلام موجه ايضا لكويتي بلوقر
حسب رايكم لازم عاشور وغيره يجيكون على كل حريم واهل المرشحين الي معاهم بالقائمة واذا لقوا وحدة مو متحجبة ولا تسمع اغاني لازم يرفضون التحالف معاه
بالله شالمنطق