الثلاثاء، 19 أغسطس 2008

اسرار الدولة بالصوت و الصورة

و اخيرا و بفضل جهودنا الجبارة و التكروت و دهان السير و بوس لخشوم قدرنا اندش اجتماع مجلس الوزارة بعد ما رد لنا بالسلامة الشيخ ناصر المحمد من جولته المكوكية لدول مانعرف وين صايرة و شنو مشهورة في ولا حتى اكلتهم المفضله
بس احنا شكو بأكلهم بنتفطر عندهم

و بهالجولة الزينة قدرت حكومتنا انها اتقردن لنا جم صفقة اقتصادية من اللي احبهم قلبكم


بو صباح نخلهم نخال و طلع منهم خمطة صفقات على اشوية اتفاقيات اقولك راح تنعش الاقتصاد تنعيش مو طبيعي


و اقولون ماكو رؤية اقتصادية بعد

عالعموم

ما طول عليكم


مخرجنا عطنا الاجتماع اهـــــــــــــــــــــــــــــــــو




الثلاثاء، 12 أغسطس 2008

حتى الاولمبياد






بطلت الجريدة من صباح الله خير بتطمش عل الاخبار مثلي مثل غيري من الزهقانين بدولة كل شي حرام


و انا اقلب الجريدة و أشرب قهوتي الفرنسية و سيجارتي الالمانية و إذا بي اقرا هالخبر






نوابنا السلف يقولون ان ملابس النساء بالاولمبياد تدغدغ الحياء و تغري و أتخليهم إسعبلون

!!


دغدغني كلامهم أول شي


و لكن بديت أفكر
عاد انا لي فكرت فكرت


كلامهم ما يدغدغ و لا إونس


كلامهم بايخ و دمه ثقيل


و لأني كالعادة كل ما قريت خبر من هالنمونه اقوم بعمل إتصالاتي السريعة و الخفيفة عالقلب إلى اصدقائي و صديقاتي اسألهم عن رايهم


و الصدمة ان هالإتصالات اللي المفروض إتردلي الإبتسامة و أحس اني ليلحين إبخير زادت من قهري و سحكي للزقاير و طلبت قهوة تركية حاجمة



فقد أجمع ربعي و ربيعاتي عالتالي


كيفهم الناس إنتخبوهم

!!!!


و أصلن من قالك انا اتابع تلفزيون الكويت

!!!!




يعني بمعنى آخر


خلوا الديرة حقهم و إحنا ناخذ وناستنا من برة سواء بالسفر للميسور حاله او الفضائيات و الإنترنت و سائر الجزر

!!





في السابق كنا إنسافر بالصيف إنشم هوا نظيف مو مغبر و نزور متاحف و مدن ملاهي و نكتشف ثقافات يديدة و نرجع الديرة مبسوطين و مكيفيـــن عالآخر


الحين صرنا إنسافر علشان إنشوف الاولمياد أو نقرا كتاب ممنوع أو نسبح بالبحر من غير ما أحد إراقب تصرفاتنا بالبحر

و نرد متحسريين و ضايجة إصدورنا
!!!!



في السابق كنا إنبطل تلفزيون الكويت و نشاهد أغنيه آه يالاسمر يا زين او إغنية ايا غالي يا بو الموقة و البنات إشحلاتهم يرقصون و مستانين و الرياييل تزفن و تصفق
الحين صرنا ننحاش من تلفزيون الكويت اللي إنعدمت فيه الفرحه و الوناسة و صارت برامجه و برامج قتاة المجد و المنار وحده
!!!!
في السابق كان الوالد و الوالدة ياخذونا البحر نسبح و نطبش و آخر شي إنتنشف و نقط مايوهاتنا عاليال جدام الأكو و الماكو
الحين بحرنا مو لنا و إنطب بفنايل و حريمنا عاليال لابسين عبي و إدلاقات إطالعونا من بعيد لي بعيد و فوق هذا إراقبونا و سجلون ارقام طراريدنا
!!!
في السابق كل ما صار عيد من أعيادنا و أعياد غيرنا يونا هالمطربين و المطربات و غنوا لنا هالغناوي الزينة و إحنا نتمايل و مزاجنا عالــــي
و الحين ماكو إلا هلا فبراير و اللي لو أقعد أشوفه على قناة روتانا أحسن من اني اروح و ما أقدر حتى أطق إرقبه
!!!



قبل إتروح المكتبة و تختار الكتاب اللي تبيه تنور فيه مخك و تزيد من معرفتك
و الحين تطلع من المكتبة مو مثقف نفسك إلا في فن الطبخ أو لي الله خذا أجلك و مت إشلون بتعذب و من وين بتدش الحية
!!!


باقوا حرياتنا
باقوا إبداعاتنا
باقوا وناستنا
باقوا فرحتنا
ملاحظة
الصورة اللي فوق تمثل تقريبا أجسام لاعبات الاولمبيد و هن عراة
بذمتكم تغري
؟؟